【家FUN BLOG】小朋友開胃食譜:椰香雜菜雞肉咖喱飯

    終於整咖喱比Bella食喇!

    可能有媽媽會問:
    吓,比咖喱佢食?!食得嘅咩?
    其實今次係用一歲咖喱磚黎做,
    口味我自己都試過,一啲都唔辣嘅,
    屬於有咖喱香嘅汁,唔會好濃味,
    不過一歲食我就真係唔建議喇,
    我自己覺得起碼兩歲半以上啦,
    所以若你哋小朋友同Bella差不多年紀嘅,
    間唔中食下無妨,
    尤其是小朋友無咩胃口嘅時候,
    用黎餸飯真係非常開胃的。
    ~小朋友開胃食譜:椰香雜菜雞肉咖喱飯~
    今次做呢個幼兒咖喱,
    用薯仔、洋蔥、雞柳肉、甘荀及西蘭花來做,
    配搭最適合不過,因為除左洋蔥,
    其他配料本身都無太多味道,
    唔怕被咖喱搶鏡,洋蔥就令咖喱汁更香甜,
    而且今次我落左少少椰奶去煮(唔用都得),
    所以除左食到咖喱味,仲有椰香,
    如果唔想用現成椰奶,
    亦可以開個椰皇或椰青,
    用佢哋嘅水代替椰奶也可。
    材料(兩份):
    雞柳1條
    薯仔1/3個
    西蘭花2小朵
    洋蔥數瓣如圖
    甘荀1/3支
    幼兒咖喱磚一格
    椰奶100-150 ml
    水100ml
    做法:
    甘荀去皮切小片、薯仔去皮切粒 、
    洋蔥切片、西蘭花浸水半小時後洗淨切小瓣。
    雞柳洗淨,切粒,再用少少鹽略醃。
    小鍋中放少許水,
    水滾後放入甘筍及薯仔煮熟 ,大約十分鐘。
    然後放入西蘭花再煮五分鐘, 再將所有材料瀝乾水備用。
    小鍋中放少許油, 加熱後放入洋蔥略炒軟。
    再放入雞柳肉炒至七成熟。
    然後加入100ml水,再放入咖喱磚,
    攪拌直至 咖喱磚全融化。
    調中火,再放入西蘭花,甘筍及薯仔,
    把所有材料與咖哩汁拌勻。
    最後,按自己喜歡的濃厚度加入椰奶。
    椰汁咖喱即成,拌飯一流,非常開胃,
    亦可拌烏冬或麵包。
    ~小朋友開胃食譜:椰香雜菜雞肉咖喱飯~
    喜歡可以留意我哋FACEBOOK更新,
    稍後會分享更多小朋友開胃食譜~
    **************************
    ~ 許許與小BELLA ~
    隨性的玩樂型媽媽~ 喜歡做BB特色料理~ 愛分享BB好物情報~
    記得留意我地FACEBOOK瀏覽更多玩樂情報及BB食譜啦~
    FB專頁: www.facebook.com/huihuiplayground
    聯絡我們: [email protected]
    SHARE