【大仔嘥七位數學費】單親媽媽羅霖唔開心:惟有做到七八十歲

羅霖在中環出席留學資助計劃發佈會,已是三子之母的羅霖表示希望最小的兒子將來讀大學可有獎學金資助,減輕其負擔,她說:「我本身當年因為經濟環境,冇得去外國留學,好早就出嚟社會做事,我第一份工係空姐,我覺得讀萬卷書不如行萬里路,去到外國之後,就會變得獨立,思想變得成熟,所以我好希望小朋友有機會、喺經濟許可之下,可以去外國升學,如果有獎學金亦係一個非常好嘅方法。」

羅霖透露二仔以獎學金在美國羅省讀心理學,她笑說:「獎學金越多越好,喺外國留學嘅費用非常之大,未計食住行,美國每年學費要50萬,英國每年學費30萬,而澳洲大概要20萬。」

問到兒子每年的學費,羅霖說:「大仔之前喺英國讀咗一年,喺美國讀咗兩年,係讀律師,上年就返香港讀平面設計,係兩個完全唔同嘅科目,嘥咗7位數字嘅學費,當時我同佢傾咗好耐,我係有唔開心,但要因應佢嘅情緒同興趣,當時我諗我咁辛苦做嘢,點解唔體諒媽咪呢?不過我始終覺得小朋友嘅健康最重要,惟有我努力工作,做到7、80歲。」

羅霖指大仔讀律師壓力大,又被外國同學欺負,加上他的性格較內向,很難處理對外嘅問題,幸好二仔性格夠硬淨,她笑說:「一個家庭裏面,第1個小朋友會好受保護,第2個小朋友會堅強啲、硬淨啲,第3個小朋友就會適者生存,佢要睇兩個哥哥面口,因為佢同哥哥相差10年,佢9歲開始就服侍哥哥,例如食韓燒,佢會燒肉畀哥哥,但冇照顧我囉!」羅霖坦言自己有個夢想,就是希望將來有機會可以再讀書,她笑說:「80歲讀大學都得㗎,讀啲興趣課程,冇咁大壓力啦!」

 

 

 

 

 

 

(綜合報道)