【高齡產兩B】患情緒病日日尋死

    現今世代,無論全職、在職、單親嘅媽媽,各有難題各有隱憂各有煩惱,若然冇適當開導,情緒問題隨時演變成抑鬱症。

     

    曾經做過EYT、以扮祥嫂出名嘅前無綫藝員馬小靈,今年42歲,同攝影師老公育有1仔1女,表面睇生活美滿,採訪當日,小靈抱住4歲仔仔一齊整cupcake時,流露媽媽嘅幸福溫馨神采,誰又想到,1年前嘅佢,情緒病嚴重到要長期食藥,日日諗各種自殺方法,務求盡快了結生命。

     

    為咗頭家,以及保障一對仔女嘅將來,本身屬高齡產婦嘅馬小靈,今時今日一個人揹三份工,包括地產、保險經紀、體檢中心職員,舊年4月,小靈再兼職做埋保險公司接待員,估唔到一份OL工作,差點推小靈至萬劫深淵。小靈表示:「好記得第一日返工係4月1日愚人節,返朝9晚6,除咗做一般reception工作,仲要幫買保單嘅VIP客人book酒店同搵車全部一腳踢,當時你冇諗過朝朝早9點要迫地鐵去新鴻基中心返工,會係一種無形壓力令你崩潰,當時好多親子活動已經甩晒,心裡面喺度諗,自己做份工又做唔好,做個稱識媽媽都做唔到,覺得自己好冇用,同老公講,佢話個個返工嘅都係咁o架啦,佢講呢句我仲慘,好似俾人插咗一刀咁,心裡面諗,咁係咪得我一個唔正常呢,呢個負面諗法一擴散,就一發不可收拾。」

     

    小靈形容當時自己生活十足行屍走肉般,黑眼圈、黃夾瘦,體重跌至80幾磅。「份工做咗3個月就辭咗職,日日匿喺屋企唔敢見人,又諗緊村屋咁矮跳落去唔會唔死……當時爸爸媽媽驚到喺澳洲飛返嚟睇我,捉我去見精神科同社工,最後屋企人夾手夾腳抬我去醫院急症室。」

     

    人生最低潮時,小靈慶幸有兩個小天使,喺身邊守護自己。「我最絕望時,連家姐都覺得媽咪好似變咗另一個人,但你只能發呆睇住佢哋,有次家姐同細佬有次走埋我身邊『媽咪、我好鍾意你呀,錫錫!』又不停錫我,當時你會覺得好難受,因為你個人唔識開心,不過之後自己就『叮』咗一聲,個腦好似清醒咗咁。當初同老公結婚,自己年紀大,自己都未湊得掂,冇諗過生BB,不過我真係好多謝老公同成日催我生小朋友嘅媽咪,生咗小朋友,係會令自己人生變得complete!」

     

    小靈指今年年初,自己終於唔使再食抗抑鬱藥,患病時當自己放咗個悠長假期嘅佢,重新投入地產工作,開新盤時繼續衝鋒陷陣,多年來做地產經紀未嘗穿過高踭鞋嘅小靈,見到家姐細佬為自己親手做嘅高踭鞋cupcake,眉開眼笑。為咗對小朋友,走出陰霾後嘅小靈話要搏命賺錢,為佢哋將來買多份保障:「小朋友對自己嚟講係一種動力,老公做攝影師收入唔穩定,萬一有咩事冇人話得埋,雖然自己有大學degree,但之前做藝人冇工作經驗,你唔做一排就脫節,所以自己喺能力範圍裡面,要搵多啲錢,地產經紀對我嚟講,算最快搵到錢嘅行業,就算日灑雨淋企到腳痛都值得!」

    (蘋果日報)

    SHARE