【囡囡絕食原因超搞笑】姚樂怡帶囡學化妝 笑言囡囡好貪靚

藝人姚樂怡、容羨媛(Fion) 、王曉君(Elaine)及KOL Amanda等早前齊齊帶囡囡出席《兒童彩妝教學親子活動》,該活動由著名化妝師Tanya Tin田雅池教授兒童化妝。
姚樂怡笑言三歲女兒Gaibe學得非常開心:「佢第一次正式聽老師教化妝,其實佢一踏入三歲,已經開始貪靚,成日想着裙,之前帶佢去主題樂園,裏面有個活動幫小朋友化妝同搽指甲油,之後佢就成日話要搽,就算搽潤唇膏都覺得好靚,今次學化妝,又有胭脂又有唇彩,佢當然覺得超靚,最搞笑嘅係,學完之後都夜晚七點幾,我諗住畀啲小食佢食頂下肚餓,佢平時好為食,但個晚佢話唔食,話驚整花個嘴,好搞笑。」
囡囡多認真。
有板有眼呢。
超可愛。
王曉君亦笑言女兒當日玩得非常開心:「佢仲好認真咁做每一個步驟,又會加自己一啲意見,導師叫用手指搽眼影,佢會話唔好,想用眼影掃,當日我想拍晒佢成個化妝過程,但到後期佢會叫我唔好影,等佢專心化妝,我覺得好搞笑,好似我阻住佢扮靚,佢真係好enjoy。」
媽媽們見到自己女女玩化妝品好像個「小大人」,都顯得格外興奮。
(綜合報導/on.cc)