【全家TG中招】黃澤鋒狂咳 太太紅疹又痕又痛 BB食人奶後都出事

香港持續發生動亂,示威者與警方暴力不斷升級,近日有不少人質疑防暴警刻意將催淚彈射入民居,令普通平民百姓叫苦連天。

黃澤鋒的太太陳麗麗同樣是受害者,她前日在facebook作出控訴:「是真的!我就是其中的受害者了!TG的殘餘物質會令你皮膚刺痛及痕癢,範圍還會擴散開去的,病徵亦會從哺乳傳給小寶寶!我只是途經事發地點也中招了,已2星期了,到現在還未復原,如受感染了大家要小心處理!點解?你可以有裝備去應付!點解?平民百姓就要赤條條去受這痛楚!」

陳麗麗在今年7月以52歲高齡誕下女兒「小黃妃」,一直餵哺母乳,不少網民都很關心她和BB,提供一些「抗催淚煙湯水」,還問她有沒有向醫生求助?但她似乎有點心灰,回覆道:「沒有!因為沒有人相信是TG所衍生的。」

相關新聞:【媽媽Group好心分享】小朋友中催淚彈好多家長做錯了 應該咁做先啱 https://bit.ly/33LphDH

【收工經旺角誤吸催淚煙】哺乳媽怕影響BB 網民慨嘆:點解要承受呢啲  https://bit.ly/37aId14

《蘋果日報》向黃澤鋒夫婦了解,原來他們家住屯門區,約兩個星期前,屯門傳出刺鼻不明氣體,有網民懷疑是警察行動洩漏催淚氣體,黃太在屋企附近亦聞到味,她說:「果日原本約咗妹妹食嘢,但佢話接囡囡放學嗰邊聞到好大陣味,叫我唔好過去,但我屋企都聞到。當晚妹妹打電話畀我,已經話隻腳腫晒,聽講仲有小朋友氣咳要入急症室。」

她稱兩日後發現心口「有啲痛」,之後便開始出現紅疹;至11月2日她去銅鑼灣做紮肚療程,遇上遊行示威活動,令她第二次「中招」,她說:「我哋喺14樓室內都聞到催淚煙,離開時候仍然好大味。之後紅疹又嚴重咗,其實痕同刺痛嘅感覺就好似妊娠疹咁,好辛苦,好辛苦!因為我有餵人奶,都有惹到畀BB,BB皮膚有一點點出咗嚟,好彩佢抗體都好好,自己就試用人奶搽傷口作舒緩,現在慢慢消緊,都接近尾聲快好番。」

對於防暴到處放TG,老公黃澤鋒有點氣憤說:「真係好似打仗咁,市民避無可避。我屋企廚房個窗對正V city,佢哋噚日又放(TG),我住中層都聞到,我就咳到黐肺!喂,不如你又試吓(TG)放題,然後餵番奶畀自己個仔食,真係人都癲!又或者面對禮賓府,放番1,000發(TG),等林鄭都感受吓,咁就公平啲,大家都感受到催淚彈嘅禍害。」


黃太更覺得「蒙面法」對大家不公平,她說:「警察有防毒面罩,但而家周圍都放,又唔畀學生戴口罩,一係大家都除,如果唔係一係叫學校統一派發防毒面罩,證明唔係自己買,係為健康唔係去示威。」會否作出投訴?黃太說:「去邊投訴?只可以呻吓,大家一齊關注問題。」

相關新聞:【媽媽Group好心分享】小朋友中催淚彈好多家長做錯了 應該咁做先啱 https://bit.ly/33LphDH

【收工經旺角誤吸催淚煙】哺乳媽怕影響BB 網民慨嘆:點解要承受呢啲  https://bit.ly/37aId14

 

 

 

 

 

 

 

(綜合報道 / appledaily)