【亂世BB】前港姐誕第3胎7磅仔仔宣佈封肚 因擔心堵路臨盆前入住酒店

由於網民本星期都有大三罷行動,各區都出現堵路情況,這位前港姐為免趕去醫院時遇上交通阻塞,日前特別入住了醫院附近的酒店,方便臨盆即趕入院。

已育有兩女的前港姐、現年36歲的關伊彤早前宣佈意外再佗第三胎,前晚10時許便順產誕下約7磅兒子,母子平安,並改名Terrence。

伊彤昨晚在社交網報喜,《蘋果日報》訪問她生產過程,她表示老公林紹奎(小巴)有陪入產房,有過生產經驗的伊彤十分淡定,她說:「生呢胎比之前生兩個家姐時間較長,我見紅先入院,仲去買咗個飯食埋先生,等陣痛好耐,生呢胎有少少辛苦,我冇打催生針,生完因為胎盤未係清得晒,我仲要留喺產房度等。囝囝喊聲特別大,爸爸聽到話佢脾氣都好大吓。」囝囝重約7磅,伊彤續說:「男仔唔好太肥,第日好難追女仔。」

老公三胎都有陪老婆入產房打氣,伊彤爆料:「我生大女時,老公陪我入去,我痛時捉住佢手,佢畀我搲損晒,今次生時,佢已提我要剪指甲,怕我又搲損佢。」

小寶寶算是亂世出生,伊彤生B前都不停留意新聞,既擔心堵路,又擔心街上多TG,她說:「最後決定租醫院附近酒店住幾晚,住到第二晚就生得,酒店冇人住都平,300幾蚊一晚。三公子喺亂世出生,我冇特別期望,只想佢健康愉快成長,多謝大家祝福。」

伊彤意外追仔成功,決定封肚,兩位家姐到醫院探望,伊彤笑言:「二家姐見到細佬剛出世樣,BB未收水,佢話佢成個洋葱樣,改佢花名做『洋葱頭』。」伊彤看過囝囝樣,指他較似爸爸。

 

 

 

 

 

 

 

 

 

(綜合報道 / appledaily)