【享清福】梅小青大病過後退休 謝賢希望霆鋒多啲關心自己

金牌監製梅小青因經歷大病,早前則宣佈正式退下陣線,做個開心幸福的外婆。
她兩年前左腦腦血管栓塞要動手術,雖然已經康復,但她也奉兒子之命退休享清福。她與謝賢(四哥)、米雪等在將軍澳電視城出席劇集《法證先鋒IV》記者會,謝賢聞得她打算退休即表示:「永不言休。」梅小青則指能邀請四哥合作拍劇已經無憾,劇集還在她五月退休前出街更加完美,她笑說:「之前最驚接到四哥電話,佢成日玩我話唔拍,每次接電話都好驚。」
講到告別作《法證IV》,她說:「好唔捨得啲同事,唔知道播大結局會點。拍《宮心計2之深宮計》已經有計劃退休,嗰陣耳鳴,好似打拍子咁,係上天畀我嘅警示,醫生診斷有條血管塞咗,但係我都堅持剪埋最後兩集先去做手術,依家好番一年一次去做檢查,會好好珍惜健康。」
四哥被問到新冠肺炎嚴重可會擔心在內地的兒子謝霆鋒?他笑說:「我同佢唔係好熟,好耐都冇見,咁大個仔唔使擔心啦,希望佢擔心我,本來佢呢排返香港但係上唔到機,依家就唔知喺邊喇。」
(綜合報導)