【佛都有火】馬國明被指是第三者令唐詩詠傳大肚 嬲住回應:我好抗拒做人地第三者

    無綫視帝馬國明在將軍澳電視城為新劇《BB大晒》,馬國明自嘲劇中賴蛤蟆食天鵝肉娶得女神岑麗香為妻,他笑說:「劇裏面我係一個粗人,香香就係文青女神,我睇完劇本都唔明香香點解會揀我,不過,佢就好專一,一心一意對老婆。(似你咁專一?)戲內啫,戲外就唔知喇,係男人都花心,諗吓都好呀。」
    不過,馬國明最近被指是第三者介入唐詩詠的戀情,更被傳令唐詩詠「懷孕」,卻令到他大動肝火。
    他表示:「其實唔係好憤怒,可能隔住個電話回應有咁嘅錯覺,不過都清清楚楚講番件事。我唔想喺詩詠同男仔之間有我個名,我真係唔知佢哋係咩關係。好似拍《On Call 36小時》我都唔知羅仲謙同楊怡拍拖,我做人不嬲都唔八,我係好抗拒人哋寫我係第三者,好似胡杏兒同黃宗澤分手又話係第三者,我都即時出嚟澄清。」
    馬國明又指傳唐詩詠大肚的新聞實在太假,他說:「呢啲新聞對女仔嚟講唔好聽,咁樣寫又於心何忍呢,緋聞笑吓冇所謂。不過好似如果呢套劇傳我同香香,人哋有老公、有小朋友,咁就唔得。」
    (綜合報導/oncc)
    SHARE