51歲溫碧霞同做投資公司董事嘅何祖光結婚17年，二人婚後一直keep住恩愛，不時一齊照顧7歲養子Xavier，不過今日有周刊指溫碧霞同老公婚姻亮起紅燈，目前二人已分居4個月，似乎係同溫碧霞近年轉戰大陸市場有關，當年憑露膊look「海潮」一角，於大陸紅足年，溫碧霞o依家返大陸仍然有價有市，未知係唔係因為老公又要成日四圍飛去公幹，而溫碧霞又成日喺大陸開工，聚少離多，就算捱得過7年之癢，最終都係分手收場。
今日有周刊向溫碧霞求證一事，佢就話：「希望大家俾啲空間我哋，謝謝關心!」
據周刊報道指二人早喺兩年前已經覺得婚姻出現問題，當時佢哋為咗養子Xavier，試過努力挽救呢段感情，直至喺今年2月時，何祖光搬出位於西貢嘅大屋，搬咗去附近一個屋苑，而溫碧霞冇再喺微博及facebook貼出同老公合照，亦冇再po家庭相。
據報道指今個月1號，溫碧霞上咗大陸開工，由司機接佢去機場，佢老公就喺佢離開屋企之後，就返舊居照顧養子Xavier，仲留宿陪伴，翌日下午先返新居，似係有心避見溫碧霞，以往假日嗰陣，老公何祖光一定親自送老婆去機場，o依家感情唔同咗，溫碧霞惟有自己去，報道又指，溫碧霞同老公一向財政獨立，二人都係大忙人，不過老公唔滿意溫碧霞成日唔喺香港，溫碧霞又事業心重，唔想放棄工作，對婚姻又冇咩安全感，先令溫碧霞想分開，據知老公何祖光仍然對溫碧霞留戀，暫時未正式搞離婚，之但係溫碧霞就堅持想過自己嘅生活，溫碧霞一直都好遷就老公，但今次似乎下定決心咁。
其實溫碧霞老公何祖光出身自國民黨名門，有傳佢爺爺係當年蔣介石身邊嘅紅人何應欽，何祖光自細就喺美國長大，後嚟做金融業有聲有色，自組投資公司，又喺大陸開食店，何祖光同溫碧霞拍拖時，有傳何祖光父母唔係咁鍾意圈中人，反對二人一齊，多年嚟溫碧霞都好少講起老爺奶奶，關係亦唔係太close。
(蘋果日報)
