方太（任利莎）爸爸係民國時候嘅高官，三妻四妾喺當時係好普通嘅事，於45年任爸爸帶住其中一位太太及幾名仔女嚟到香港，之後到方太嚟到，一家幾口當時住喺北角一幢唐樓。因為方太媽咪早逝，同有媽咪嘅兄弟姊妹相處得唔快樂，佢形容當時係每日喺屋企都喊，方太話：「嗰時爸爸開咗間餐廳同辦館，因為我冇媽媽，得我睇舖。咁唔通你唔睇呀？以前收舖收12點，喺咁嘅情形之下，你喺屋企唔開心，喺學校讀書讀唔到，o依家啲女仔叻，識出走，嗰時我哋唔敢，驚餓死同失禮自己，所以結婚係唯一嘅出路，我20歲就結婚。」
方太同先生嘅邂逅都幾似電影情節，話說每日以淚洗面嘅方太，令佢暫時釋懷嘅係每星期嘅「紅荳冰時間」，佢話：「我同先生拍拖好浪漫，喺彌敦道屋企舖頭附近有間店，我去食3毫子紅荳冰，係我最開心嘅時間。」方太話當時好興jukebox（點唱機），入一毫子就可以點歌聽，不過當時方太只係夠錢飲冰，佢笑笑口話：「你食3毫子冰，咪坐喺度聽人哋點啲歌囉。嗰時喺屋企好苦悶，我唔可以同爸爸講同同父異母兄弟姊妹相處唔嚟，喺冰室就遇到我先生，佢成日都喺度，佢好靚仔，有少少混血，乾淨企理，我自細就鍾意靚仔。」
方太先後講咗老公4次好靚仔之後，佢跟住話：「佢知道我鍾意聽咩歌，跟住佢就點，你會知道佢係特登點畀你聽。見得多咪打招呼，講真少女時代好寂寞、好唔開心，有歌聽吓覺得好享受。」被方太形容好靚仔嘅方生，人稱方達，是直譯佢嘅英文姓氏Fonda，身高5呎10吋嘅佢絕對係高大靚仔，又喺英國軍部工作，職位係後備後軍上尉。到咗聖誕節方生終於出手，約方太去街，方太話：「佢帶咗我去姐夫屋企食飯，姐夫係英國人嚟香港做幫辦。冇耐佢就同我講你嫁畀我啦，嗰時大家都係20歲左右，相識頭尾一年多啲，以前我哋拍拖，睇戲都唔拖手，所以覺得你哋o依家好奇怪。」
嗰時方太諗呢個係離開屋企唯一辦法，同老竇講結婚時，嚇到佢窒咗。最後反對唔成之下，方太兩公婆都係開個茶會當擺酒，喺當時嚟講都幾前衛。不過呢段婚姻只係維持咗33年，最後都係離婚收場，方太話當一個人越行越遠，而另一個仍然表現不太成熟時，分岐就出現。
其實方太結咗婚之後，為咗生計，有一段時間去北角都城戲院做劃票員，仲引嚟過狂蜂浪蝶。當時有一位有錢嘅英印混血兒日日嚟睇戲，一定坐樓上超特等，仲成日借機搭訕，又買埋陳皮梅畀方太，有一日佢邀請方太返屋企食飯：「都唔知點解自己會去，佢食完飯同我講話好鍾意我，如果你做我女朋友我會畀間屋你住，點樣、點樣。我覺得呢個人不懷好意，之後就請經理調咗自己去另一個部門。」
其實除咗呢位英印過客，方太仲有一位曾任職航空公司嘅知己、伴侶，可惜對方已經喺多年前離世，方太帶點唏噓話：「同呢位知己相識咗33年，認識嗰陣都係大家唔快樂嘅時候，到後來大家一齊生活咗17年，大家都有大家嘅故事，關係可以講係好知己朋友，可以講係一個伴侶。」
(蘋果日報)
