蘇玉華同潘燦良今日喺觀塘為舞台劇《謊言》做綵排，劇中阿蘇同潘燦良喺各自有另一半嘅情況下發展婚外情，而喺偷情途中被雙方伴侶踢爆，兩人仲即場示範其中一幕偷情戲。
阿蘇同潘燦良接受訪問時透露，兩人過往已經合作過好多次，阿蘇話：「我哋分別做個情人同夫妻，偷情就係第一次，感覺都幾得意，現實生活中無得偷，喺劇入面玩吓都幾開心。」潘燦良又話套劇將會喺8月11號到9月3號公演，係佢同阿蘇等人成立嘅Project Roundabout，推出嘅首套劇，佢話：「套劇係改編外國舞台劇，劇情係搞笑幽默，總共廿幾場啲飛都賣得好好。」
佢哋又話Project Roundabout係一個三年計劃，希望每年推出一套劇，阿蘇又話開心見到近年劇界熱鬧蓬勃：「近來劇界多咗人關注，而且有唔少有份量嘅演員加入，好似黃秋生咁，覺得係一樣好事。」
(蘋果日報)
