郭富城喺4月同方媛（Moka）結婚，城嫂當時已經肚凸凸，婚紗都係揀傘裙，似乎有意遮肚。
一直有傳城城已經揀好養和醫院，俾老婆喺香港生BB，早前有報道指城城第一胎係女，9月就會出世，城城仲已經喺上海買定3千萬豪宅俾老婆同B女住。睇番日曆，小天后好快就出世喇！不過城城真係好忙碌，據知佢喺9月初開工，再同《踏血尋梅》導演翁子光合作，希望小天后好腳頭，為爸爸嘅新戲加油，贏多次最佳男主角。呢齣新戲，據知仲有位好有份量嘅神秘男主角。
城城9月安排好工作，咁城嫂呢？有啲玄機睇到，Moka上個月30日high tea，雖然instagram係單人照，但upload上微博嗰張就多咗位中年女士，Moka仲話：「喜歡工作忙碌的每一天，最近有點空的好不習慣，出來透透氣。」言語間透露自己待產中。
無錯喇，城城喺工作之餘，已經同外母傾好，到時外母會留多陣，照顧Moka同B女，等佢哋有多啲時間三代同堂，同時自己又唔使咁頻撲。郭天王，真係周到喇。
(蘋果日報)
