【Sweet到呢…】JT錫錫X5賀媽媽周家蔚生日

    藝人洪天明同老婆周家蔚(Janet)2012年拉埋天窗,婚後三年抱兩極速造人,Janet自此就淡出娛樂圈,專心湊兩個仔洪大仁(TJ)同洪竟琋(JT),閒時就出席吓活動,呢啲少奶奶嘅生活真係聽到都覺得Enjoy!

    已經係兩子之母嘅Janet下星期就踏入34歲生日,不過佢嘅「生日飯局之旅」就已經開始咗,見佢今次上載多張合照,透露係好友為佢搞咗個預祝生日嘅飯局,當中兩個囝囝都有出席,連周媽媽都有現身,不過就未見老公洪天明嘅身影。

    眾人為Janet準備咗靚靚生日蛋糕,Janet開心切cake之餘,又孖好友同囝囝影合照,佢仲上載咗一段Sweet爆短片,片中一開始就見到JT趴咗喺Janet身上,佢仲送上肉嘴錫錫媽咪至少3秒,之後佢再好似啄木鳥咁連環錫多4次,冧到Janet都笑到見牙唔見眼,濃濃愛意滿瀉,呢份生日厚禮真係勁窩心呀!

    (on.cc東網)

    SHARE