【小朋友尷尬到面紅】薛世恒焗住認自己係袁偉豪

 

陳法拉前夫兼「Neway大少」薛世恒接受電台訪問,講到他跟袁偉豪撞樣。

薛世恒表示:「我同佢(袁偉豪)幾friend,之前都一齊玩過電單車。」

「有啲角度似,影相都試過認錯,幾年前仲似。」

問到有冇人認錯過佢哋,薛世恒就話:「試過畀Ben嘅朋友或合作夥伴認錯。」

「開頭幾尷尬,惟有硬啃,但有次我試過話唔係,有次有個小朋友以為我係Ben,搵我影相,但我話唔係,之後佢成塊面紅晒,所以認咗佢算。」

另外,講到他公司當年簽了王浩信為首個藝人,他表示當年想簽一個歌手,經同事物色下找到對方。

「同事話佢係型在骨子裏,我都覺得佢好努力,覺得男仔肯努力就可以行到好遠,所以就簽咗佢,但之後我冇做到(捧他),所以我唔覺得自己幫咗佢好多,佢有今日係靠佢自己努力,我唔多想提呢件事,係因為覺得英雄莫問出處。」他亦讚對方很努力,為保持身形,指對方連打邊爐都只是用清水白烚。

(on.cc 東網)