呢啲重要日子，梗係要留畀男朋友仔啦！粉絲見到後都紛紛向佢哋催婚，唔知幾時好事近呢？
「宇宙天后」鄧紫棋（G.E.M.）昨日26歲生日，佢連日嚟都有唔少慶祝活動，包括出席好友何超蓮、王君馨、鍾舒漫、鍾舒祺等為佢提早一日搞嘅生日P，而佢男朋友仔Mark Ngai當日亦有驚喜現身，睇嚟兩人打算唔再密冚戀情！
生日呢啲重要日子，正日梗係要留畀男朋友仔啦！G.E.M.昨晚喺Instagram晒出一張食燭光晚餐嘅相，相中見佢去咗一間高級餐廳食飯，不過就全程唔見佢男友Mark入鏡。去到食Cake時間，G.E.M.就雙手合十許願，仲瞇眼甜笑着許願，個樣勁冧！G.E.M.仲表示：「Best birthday dinner ever.♥️（最好的生日晚餐）」睇番個影相角度，揸相機嘅人似乎係坐G.E.M.隔籬，唔使估一定係男友啦！
至於未有入鏡嘅Mark，之後亦有喺Instagram高調地晒出N枝紅玫瑰，並祝G.E.M.：「Happy Birthday. ❤️（生日快樂）」而G.E.M.收到啲花之後，亦嘟起個嘴仔話自己係呢個世界上最幸運嘅女孩，閃到呢……粉絲見到後都紛紛向佢哋催婚，唔知幾時好事近呢？
(東方日報)
