【親口承認拍拖】袁偉豪:我未過試用期

型男袁偉豪(Ben)到旺角出席咖啡活動,即場示範沖泡咖啡。

與港姐張寶兒的戀情曝光後首度現身的Ben似乎早有準備,記者恭喜他有拖拍,他即大方承認戀情說:「Ok,識個新朋友。(係咪拍拖?)算係,始終大家都要工作,咁我未過Probation(試用期),大家仲需要時間磨合。(係咪《打工捱世界II》撻着?)你哋覺得係就係喇,喺旅程了解對方嘅,始終都有三個月時間,本身都想穩定啲再講,大家知我比較低調,但始終紙包唔住火!」

講到繼前女友岑杏賢後再與港姐拍拖,Ben因而被封「港姐殺手」他笑言:「要多謝大家畀面,只係咁啱有緣,我做大媽殺手都得。自己都想向前,到咗想穩定嘅年紀,始終感情事好難講,自己做嘢工作圈子都愈來愈細,見得多嘅都係同行,經過我多番考慮,決定坦誠面對。(張寶兒有咩吸引你?)主要係眼緣,佢份人好甜、心地好、係吸引嘅。(見咗家長?)未,大家都忙,今晚都要返深圳拍嘢,大家暫時手機聯絡住先。」

(on.cc東網)