【等緊翠如BB求婚】蕭正楠都恨結婚:唔想等

蕭正楠(Edwin)、曹永廉(阿廉)、王君馨等於將軍澳出席《超時空男臣》之「超時空午宴」活動,無綫助理總經理(戲劇製作)曾勵珍亦有現身,更大讚眾演員演技出色。

Edwin日前與女友黃翠如到英國旅行,問到此行是否籌備婚禮。

他笑說:「我都唔知乜嘢叫睇景,拍戲就要睇景啫!我未去過英國,今次係正式去。我拍咗三部劇,好耐冇休息,咁啱佢都去探細妹,大家決定去呢個旅行,但只不過係一個好普通嘅旅行,唔好將結婚、度蜜月掛鈎。」

對於阿廉上次宣傳劇集時指後生仔有衝動註冊,Edwin笑說:「我都唔後生。」

 

 

 

 

 

 

 

 

他又指女友從來未入球場睇波,今次卻與他一同睇愛隊曼聯的比賽:「佢唔識乜叫越位都問咗我半個鐘。」

問到翠如BB係咪等佢表示,Edwin:「我都等佢喺七萬幾人前求婚,等到入球都未等到,大家互相等。不過呢個trip令我更加了解佢,佢好錫佢細妹,又知慳識儉,漢堡包貴都唔捨得食。佢係好女仔,娶得過。」

身旁的阿廉笑指Edwin可能早已求婚,但被女方拒絕。Edwin笑說:「唔係!今次純粹旅行,我都等佢求婚,佢性格好怪,要畀佢做主動。希望快啲,我都唔想等咁耐。」他表示父母未有催婚,現先畀心機工作。

(on.cc 東網)