【以前唔係咁】 杜汶澤入院歎:我要振作!

杜汶澤日前上載入院照,成面鬚根,躺病床打卡。「大家要注意,任何事情不要過量,愛惜身體,不要沉迷於追求健康的同時,亦無需刻意破壞,因為人身難得,該好好修行。」

其實早一個星期阿澤因為感冒要食藥,仲喺fb貼過相,話o依家係流感高峰期,呼籲大家要小心身體,過咗兩日佢就為江若琳同男友Oscar加埋導演邱禮濤親自下廚,煮咗唔少好嘢,見佢喺fb貼嘅相都感受到杜生杜太同好友玩得好開心。

不過唔知係咪因為開心得滯飲多咗兩杯,第二朝阿澤就已經喺fb話自己「我諗我要比個胃抖下」,點知冇耐就見佢入咗院。

之後阿澤於fb寫道:「助手琴日打俾我,佢話我以前唔係咁嘅。其實你以前無飲咁多酒0架……」「係咩?……好似係。我要振作!」

杜太田蕊妮出席劇集宣傳活動時,話阿澤已出院,入院原因係飲酒太多致胃出血。醫生講明阿澤要禁酒兩星期,阿田就諗緊將酒櫃上鎖。

雖然醫生只係要阿澤戒酒兩周,但阿田就覺得太少,不過就冇諗住要老公戒酒,只要唔好一次飲咁多,唔好過量就OK。

「我諗之後佢都唔可以喝太多酒,唔使極端到戒酒,但唔使飲太多,或者每晚都飲。」收埋啲酒?「我收唔到,因為真係好多。佢好鍾意收藏酒,有時候會去搵鍾意嘅酒,得閒就去買酒。」

(Apple Daily)