今年27歲嘅前港姐季軍劉佩玥(Moon)，舊年同伍允龍合作《城寨英雄》撻着，不過早前有傳Moon同伍允龍已經散咗。仲有指升呢做娘娘嘅Moon，收收埋埋唔少兵仔，分別有圈中「花王」周志文、ViuTV藝人陳安立等。
今日，Moon嘅兵庫又有新兵哥，講緊嘅就係同Moon、周志康近排組成嘅「Happy Live」合唱團嘅翟威廉。
有周刊話，Moon近排密密上翟威廉屋企，Jam歌Jam出真感情，暗撻3個月。同時，二人又喺新劇《跳躍生命線》中做情侶，名正言順，寓工作於拍拖，更喺其中一場拍攝中，奉旨咀嘴。
另外，周刊指Moon同翟威廉喺拍攝期間，試過一包麥精兩份飲，Moon自己飲完，好順手遞俾翟威廉啜，見對方熱，Moon仲劇本當扇，幫翟撥涼，有娘娘幫自己撥扇，翟威廉當然冧爆。其實做慣兵嘅翟威廉，之前一直圍喺陳庭欣身邊氹氹轉，自從女方暗中另結新歡，已有兩年冇拖拍，眼見Moon身邊未有真命天子，當然加多兩錢肉緊，最終追玥成功。
(蘋果日報)
