34歲嘅苟芸慧(苟姑娘)已ready做人妻，今年6月收下富三代男友陸漢洋(William)嘅家傳之寶。雖然未正式過門，但苟姑娘真係好「旺夫」，早前William更率領「一颷賽車」到馬來亞西出戰「亞洲勒芒衝刺盃」，結果勇奪年度總冠軍，成首位奪得該項殊榮嘅華人，認真威威！
苟姑娘o依家嘅正職就係做跟得女友，跟住William四處出埠賽車，有影皆雙。
不過，前日讀者吳先生透過爆相爆料，表示前日中午近12點喺灣仔入境處見到苟姑娘一個人，佢着住黑Tee黑裙同戴黑超，打扮十分低調。
吳先生表示認得佢嘅人唔多，佢話﹕「佢好似去補領身份證啩？！嗰陣都幾多人，但大部份都係唔同種族人士，有外國人、南亞裔、大陸人，反而冇乜香港人，所以冇人認到佢。」吳先生話見到苟姑娘喺前排角落位坐咗一陣，跟住就行咗去領證處，攞完之後好快就走咗。
苟姑娘透過短訊回覆﹕「哈，唔係唔見咗(身份證)，我去換/攞三粒星永久身份證。」哦…數數手指，苟姑娘其實係08年多倫多華裔小姐同09年國際中華小姐冠軍，之後佢就嚟咗香港發展，直至去年底約滿無綫先唔再續約。現在居港滿七年，正式成為香港人，真係恭喜晒！
(蘋果日報)
