阿姐汪明荃昨晚喺紅館嘅演唱會圓滿結束，阿姐出席慶功宴嘅時候就話今年其實都有好多計劃，除咗演唱會仲會拍特輯，阿姐話到時會諗下搵啲咩嘉賓，阿姐仲話：「本來仲想整個展覽，但係真係趕唔切，要準備呢一個演唱會，自己因為太忙都推咗好多個劇，只能夠客串幾場戲。」
喺慶功宴上大會仲送上生日蛋糕，現場人士亦都紛紛唱生日歌祝賀阿姐生日，之後在場人士更起哄叫家英哥咀阿姐，家英哥笑住話：「咀咩呀咀，o依家都唔興㗎啦，佢話唔咀㗎嘛，我聽佢講定聽你哋講好呀？」切完餅，阿姐話要落返台食啲嘢，咁家英哥就上台搞氣氛，「only you」咁起勢唱，然後又唱咗《我向你求婚》，唱完又話：「嫁俾我好唔好呀？」不過呢個環節，家英哥有家英哥唱，阿姐喺台下只係望咗佢幾眼，無理佢繼續食嘢。
事後阿姐喺慶功宴上接受訪問，問到只開兩場夠唔夠喉，會唔會開Part 2？阿姐就話：「都ok㗎喇，開唔開part 2就未知，未有咁嘅打算住，多一場都ok，再多就唔好喇，因為太攰。」講到有冇其他慶祝生日嘅活動，阿姐就表示冇喇係咁多。點解呢次演唱會唔同家英哥合唱？阿姐講笑話：「因為呢個演唱會唔使佢唱歌。」記者讚頭先家英哥好好，上台搞氣氛俾時間阿姐食嘢，阿姐都讚：「係囉，佢都做得到。」兩人之後會休息一陣，一齊去旅行。講到最鍾意演唱會邊part？阿姐話：「每一part都咁鍾意，真係有好多歌想唱要揀，揀咗啲俾趙增熹 再編曲。」佢話真係好多歌都唱唔晒，但唔會巡迴，好多謝朋友賞面出席。
(蘋果日報)
