梁詠琪(GiGi)、趙增熹同鄺美雲今日喺銅鑼灣出席「水月玲瓏」鋼琴拍賣發佈會，為內地心患嘅兒童籌款，GiGi現場同趙增熹演出《花火》一曲，GiGi話：「希望拍賣到800萬，阿熹一個月前叫我出席，我覺得好有意義，今次係義務。」
GiGi話囡囡Sofia屋企都有個BB琴，問佢囡囡係咪好有表演天份？GiGi話：「佢有見我彈琴作曲，都有興趣唱歌跳舞，好似上咗鏈咁，我唔會阻止佢嘅創造力，由佢扭身扭勢。」
GiGi話囡囡已經開始讀學前班，仲話佢好鍾意學校生活，自己同老公都因為囡囡返咗學唔捨得，GiGi除咗要習慣早睡早起陪女返學，仲會經常同老師聯繫，update返囡囡喺學校情況。
GiGi又話未知嚟緊仲有冇合作機會，問到仲有冇邊個舊拍檔想再次合作？GiGi諗都唔使諗就話：「華仔，喺我演藝生涯同佢合作咗3部電影，打麻雀嗰套好多人談論，我一出道就同佢合作，佢係我嘅lucky star。」
