40歲嘅陳山聰曾經因為一段婚姻，又同豪門千金拍過拖，最後分手後賠上事業、金錢、愛情同形象，淪為四失聰，不過識咗做美容顧問女友Apple，喺女友嘅支持下，重新起步，日前有周刊直擊陳山聰靜雞雞去咗買求婚戒指，打算明年初完成手頭工作後，就飛去外地旅行結婚。
陳山聰今日喺紅磡出席活動，講到買戒指呢件事，佢話：「係呀，其實係睇戒指，而唔係買戒指，我o依家先知鑽戒真係好貴，所以我o依家要睇吓自己儲幾多錢先夠。」不過講到婚期，陳山聰話大家未決定，應該唔會好耐，總之有消息會通知大家！下個月9號係胡定欣嘅生日，唔知陳山聰又有冇諗住俾乜嘢驚喜呢？佢就話：「睇吓佢會唔會搞party先喇，會唔會介紹男仔俾佢？佢咁老，唔使介紹喇，冇喇，講笑啫！」定欣就話生日會同啲姊妹一齊慶祝，佢仲話：「唔好成話我要搵男友，講到我都唔想搵喇！」
(蘋果日報)
