【後父都唔易做】Mark嫂梁家玉:真係唔可以唔嫁畀佢!

    雷頌德(Mark)同老婆梁家玉(Jade)結婚以來一直都咁恩愛!問到點相識,Mark抵死話:「拍戲識囉!Jade成個男人咁,又同我一樣揸電單車!」

    鄭紹康問Jade當年帶住個仔嫁畀Mark,本身有冇顧累,Mark又搶住答:「都咁老囉,仲有咩顧慮呀?」Jade即對住老公反白眼話:「當時我得廿幾歲,你係咪想死呀!」

    不過Jade事後就指Mark係個愛屋及烏嘅人:「真係唔可以唔嫁畀佢!」Mark亦不諱言:「我都係單親家庭長大,自細跟住媽媽,所以我好清楚Jade嘅情況,亦好明白作為一個後父嘅責任!」

    身為天王黎明御用音樂總監嘅Mark,就自爆曾經同黎明喺韓國晚晚蒲夜名。Mark解釋話:「當年黎明去咗韓國一轉,返嚟同我講要唱快歌!我心諗快歌,我拿手啦!點知寫畀佢,佢話:『都跳唔到舞嘅,聽咗都唔想郁』,最後佢捉咗我去韓國兩個禮拜!」

    Mark回想嗰段日子,日日去唔同夜店觀摩,佢話:「黎明要我觀察,到底播咩歌先會令人跳舞,嗰次真係一個好好嘅經驗!」

    本身讀土木工程嘅Mark,最後行咗音樂路,Mark係怕萬一做音樂賺唔到錢時,仲有工作可做;正如啱啱出道,佢同馮德倫組成Dry,最後分道揚鑣,Mark笑言:「咪就係因為冇錢賺囉!個個都叫我哋去唱,但個個都唔俾錢,免費唱,喂,我件件衫都好貴o架,冇回報做嚟仲乜?唔好嘥時間啦!」

    (蘋果日報)

    SHARE