現年23歲嘅日本青春女星武井咲目前趕拍主演新劇《黑色皮革手冊》，當地雜誌《週刊女性》今日卻驚爆武井咲已未婚懷孕，更決定同拍拖多時嘅男子組合EXILE主音TAKAHIRO奉子成婚。
消息指，武井咲同TAKAHIRO於今日低調註冊，懷有骨肉嘅女方預產期係明年春天。黃昏時份，TAKAHIRO同武井咲聯名發聲明公佈婚訊，武井咲現時懷孕三個月，佢仍會繼續為10月開播新劇進行拍攝，一對新人冇打算開記者會交代婚事，婚禮方面暫時亦未有計劃。
早在2015年，TAKAHIRO飛甩AKB48舊將板野友美後，火速換畫戀上合演警匪劇《戰力外搜查官》嘅拍檔武井咲，當時TAKAHIRO被發現戴上口罩夜訪武井咲香閨，令戀情得以曝光。不過當時雙方事務所否認二人拍拖，武井咲發言人仲指兩人唔會再私下見面。
(蘋果日報)
