【秋官係救命恩人】石修曾患怪病:由150磅跌落105磅

演員石修從影超過六十年,在電台錄音訪問暢談當年,原來石修十九歲認識當年十四歲的太太,二人交往九年才結婚,他感謝太太陪他渡過不少難關,當中包括當年拍《楊門女將》前,原來他一度患上消化系統怪病三年,他說:「到依家都唔知病因,就係個胃忽然失去消化能力,食咩都消化唔到,當時我食一條菜,就會原條排出體外。我喺一個月內,體重由150磅跌落105磅,連行步路都冇力。」

當時他和太太都不知所措,遍尋名醫、吃很多藥都不能治愈,正當他與太太都絕望欲放棄時,幸得「救命恩人」鄭少秋出手相助,他說:「呢個真係個緣分,有一日阿秋同我講:『阿修!我認識九龍仔公園嘅一個太極師傅,好犀利㗎,不如我哋去試試啦』然後,阿秋帶我搵嗰個師傅。阿秋好好!要知佢嗰時有幾忙?佢陪咗我一星期,每日朝早六點幾就帶我去打太極。然後真係好神奇!打咗一星期多太極,全身關節都變暖,食欲又開始增多,漸漸開始回復消化能力。三個月後,個怪病現象就唔見咗。」至今石修仍指秋官是他的救命恩人,他說:「佢救咗我條命,真係好感謝阿秋!」

被問及當年作為一線小生,常與不同花旦合作,卻鮮有緋聞,石修說:「其實係有誘惑嘅,人有感情,特別喺演戲嘅時候,你長期對住對手,係會出現假象,會唔小心向對方投入感情。但如果同對手冇呢個感覺,戲係好難演,所以係一定會有假愛情。」但面對這些愛情假象,石修卻從來沒傳出緋聞,他說:「我自己好識得處理,因為同呢啲對手拍完一部戲,就好快會拍下一個,對上一個嘅感情就淡咗,就再出現下一個假象,感覺又會再消失。但最重要,係因為家庭對我有好大嘅信心,對我十分信任。而一直以嚟冇緋聞,就可證明我可以抽離。」

陳爸爸和石修,兩代都是影視圈的人,及至03年連石仔陳宇琛都欲加入娛樂圈。但原來最初石修不欲家中第三代也加入娛樂圈工作,他說:「我係唔太想石仔入行,我同佢講過、分析過,話佢知入娛樂圈唔係讀幾多書,或者有幾多能力,就一定做到一個位置,或得到肯定。因為呢行係有啲奇怪,好視乎個人際遇。」但最後作為一個好爸爸,石修尊重兒子的意見,讓他入行發展,他說:「按依家嘅親子相處之道,總唔可以一句『唔得』制止佢。所以佢想去試,我就畀佢去試,但我已忠告咗佢得到嘅未必係佢所預期。我想佢都有壓力嘅,我會鼓勵佢如果想做就努力啲,惟有咁樣。」

(on.cc東網)