【母親做清潔工養家】「五億駙馬」黎諾懿曾窮到住劏房、拎綜援

「五億女婿」黎諾懿三年前娶前落選港姐李潔瑩(Nicole),屯門屋村仔同富家千金女開花結果。今年4月,二人愛情結晶「小春雞」出世,黎諾懿亦時不時會貼囝囝得意相上IG。

 

做咗乘龍快婿嘅黎諾懿,婚後同老婆都仍舊租住700呎西貢村屋,老婆亦不介意同黎諾懿食茶餐廳。

外父都有提議叫佢哋返豪宅君頤峰娘家住,反正地方大,不過黎諾懿兩公婆就未為所動,直至囝囝「小春雞」出世,佢哋為方便照顧囝囝,先決定上樓。

入行15年嘅黎諾懿,從不隱瞞自幼家境清貧,爸爸生前係運輸工人,喺黎諾懿細個時候,因癌症離世,由做清潔工嘅媽媽養大佢哋三兄弟。媽媽一個人搵四個人食。

今日有報道指黎諾懿一家更曾試過攞綜援,到黎諾懿預科畢業後喺銀行做會計文員,原本時間、收入穩定,但黎覺工種太悶,所以喺01年決定考入無綫藝員訓練班,更因此同媽咪一度反面。

入行第二年,天降機會,黎諾懿以新人姿態,成為青春劇《四葉草》男一,之後更同林峯、吳卓羲成為奧運之星,但後勁不繼嘅佢,06年拍完《溏心風暴》後,有一段時間冇嘢撈試過一日三餐啃麵包,更試過租住180呎劏房。

曾經諗過放棄嘅佢,原打算07年返大陸做埋《舞動奇蹟》撈一筆就轉行,點知冇跳舞根底嘅佢,戲劇性攞咗冠軍。

《舞》之後再到《愛‧回家》嘅馬壯,事業運開始順暢,加上又同千金老婆結婚,事業、愛情都轉入大直路。

(Apple Daily)