【同定欣情況唔同】單文柔:我同展鵬相處得好開心

單文柔、關之琳今晚喺富豪機場酒店出席「善學慈善基金」晚宴,單文柔單拖冇伴,佢話係公司安排,只係搵咗華姐冠軍余思霆同落選港姐魏韵芝一齊嚟。單文柔話自己好少出席呢啲慈善晚宴,咁係咪因為同陳展鵬一齊、所以多咗人識?佢就話:「可能係嘅,不過我希望大家認識我,唔係因為展鵬嘅關係,而係因為我嘅工作。」哦…

廣告

廣告

成為陳展鵬fans公敵嘅單文柔,表示依家嘅工作主要都係指會拍住兒童節目先,嚟緊會加入《安樂蝸》,咁陳展鵬有冇幫手拉線爭取機會拍劇?單文柔稱:「邊有可能拉線?我都未有咁嘅實力,就算佢有教我,都要打好個底先,如果唔係有機會嚟嘅時候都拉唔住。」

最近陳展鵬拍嘅《同盟》播出緊,劇中同胡定欣有好多親密嘅場景,咁話晒嗰陣佢兩個係奉旨拍拖0架嘛…咁依家當然事過情遷啦。問單文柔睇到會唔會眼火爆?佢即時爆笑,仲大讚佢兩個係好拍檔,但現實身份嘅陳展鵬就好唔同。咦,言下之意,係咪想講現實身份嘅佢同陳展鵬夾啲?單文柔即話:「冇得比較嘅,我同定欣嘅情況都唔同,我同展鵬相處得好開心。」

關之琳就話今次撐好友趙曾學韞而來,近日就參加大陸真人騷《我們來了》,佢話:「每星期來回四日,仲有四集就拍晒,感覺好辛苦,但應承咗就要做,冇得瞓冇得食。中國地方好大,成日趕嚟趕去,天氣又好熱,搞到虛脫咁滯。」咁辛苦,下次仲會唔會接?之之即謂:「我喺訪問講過真係唔好搞我喇!今次好特別,講文化,咁玩遊戲我接受到。」有指之之酬勞高達4,000萬,佢馬上避談:「唔好講呢啲,一日拍20個鐘,拍足四日,拍到上飛機。咁我又唔後悔接,接得就盡力做。大家玩到散晒,睡姿都畀人影埋出嚟,但算係好好經歷。」

(蘋果日報)