【梁浸浸螢幕處女作】講到生多個B Yumiko就話⋯

鄭希怡(Yumiko)今日到灣仔會展為《毛織大匯演》行騷,佢話已經事隔多年冇做過時裝騷Model:「希望一陣慢慢行,唔好跌親。」Yumiko又透露產後已經成功修身,而且比產前仲Fit,整體細咗一個碼。

日前正日生日嘅Yumiko,問到點慶祝?佢話:「生日正日我喺大陸拍緊真人騷,親手試牧羊、揸羊奶同捕魚,可以話係最有意義嘅生日。」Yumiko又透露,今次節目係囡囡梁浸浸首次母女檔上陣:「因為主題係親子,所以梁浸浸都有份拍,中間發生過好多趣事,令我哋母女關係一日千里。」

Yumiko坦言囡囡一向比較黐工人姐姐同婆婆,但自從拍完節目後,o依家黐到佢實一實:「簡直好似冇咗我唔得咁,被需要嘅感覺好好,但一個就夠啦,多一個都唔得,因為會冇晒時間做其他嘢。」

話晒都叫梁浸浸嘅螢幕處女作,係咪酬勞好豐富先打動到你哋答應演出?Yumiko唔肯正面回應究竟有幾多,淨係話:「正常價啦!」講到大陸早前傳出會抽起《爸爸去哪兒5》,以免過度消費明星子女,問到Yumiko拍攝中嘅節目有冇受影響?佢話:「我冇收到消息,目前仍然如常照計劃拍緊。」

(蘋果日報)