吳若希同男友何兆鴻（Alex）拍住拖入沙田馬場，原來係幫朋友名下的「君臨大地」打氣。
已成為人母嘅吳若希腳頭特別旺，「君臨大地」喺明星效應下，跑都跑得快啲，最終跑到第一名。
吳若希一入場幫拖就帶挈幕後贏馬，真係名副其實嘅幸運星，喺凱旋門影相時，梗係成為焦點啦！
其實呢，今年初吳若希佗住B第一次入馬場，雖然嗰次佢冇拉頭馬，但就中到1賠34嘅冷門，當日佢仲開心到跳跳紮，High到唔記得自己大肚添！
吳若希接受訪問，就話：「我朋友隻馬出賽，係我人生第一次拉頭馬，好開心呀，我同男友注碼好細啫，獨贏、位置Q、連贏都中晒，可以買到手袋囉。」
(on.cc 東網)
