【好老公好爸爸!】陳豪:辛苦嘢唔好畀太太做咁多

前港姐陳茵媺(Aimee)同老公陳豪出席Tiffany & Co.活動,Aimee宣布正式投入工作,陳豪表示兩夫妻很久沒有一同出席公開場合:「太太佢都收埋咗好耐,回復狀態都係時間亮一亮相。佢本身都鍾意拍電影,都係好事嚟。」問陳茵媺對復工習慣?她說:「慣呀,我覺得好似冇離開過咁。我本身都鍾意做嘢,初時以為自己會唔慣,但好快已經Pick Up番,因為我好享受工作。」

錫住老婆禁夫妻檔出騷

Aimee表示電影《日月星》經已拍攝完畢,認為是次拍攝是新挑戰,培養到自己的工作情緒,陳豪隨即稱讚太太:「進步咗!」問Aimee忙於工作會否不捨小朋友?她說:「都會,但同時我都太熱愛演戲,有新角色挑戰,點樣快啲入戲,我覺得呢個新挑戰都幾成功。」兩人對於夫妻檔拍電視劇認為未是時候,陳豪說:「都長時間,啲小朋友三、四個月唔見咗Daddy都算,唔見埋媽咪點算?電影同活動都OK,但電視劇辛苦嘢唔好畀太太做咁多。」

唔介意小朋友出鏡

二人又透露有廣告接洽拍攝,但陳豪指之前推了不少job:「因為嗰時未係時候同狀態。(依家要接多啲?)Of Course!(會接親子真人騷?)有傾過,睇吓咩程度,我哋又唔係太抗拒。」Aimee表示不介意讓小朋友出鏡,坦言歡迎任何機會:「要睇吓個性質同埋都需要傾吓。」

封肚唔生住

問二人會否再追第四個小朋友,陳豪說:「都係嗰個問題啦!上次有人提議我做絕育手術,生唔生一件事,絕育梗係唔得啦。」又直言不會在現階段生小朋友:「遲多幾年先,等三個小朋友再大個先。」Aimee笑說:「對我嚟講就真係做吓嘢先,三個都已經踢腳,佢哋歲數好密,所以都係做嘢先。」

(on.cc東網)