今年9月9日係嘟姐鄭裕玲正式登六嘅大日子，話晒嘟姐係阿姐級人馬，慶祝活動又點會得1、2個呀！
o依家嘟姐同埋農夫仲有蕭正楠喺意大利拍旅遊特輯，今日凌晨佢哋喺網上玩直播，原來佢哋同嘟姐補祝生日，農夫同蕭正楠除咗送一大紮玫瑰之外，仲送咗一份好特別嘅禮物俾佢！
最初嘟姐估係袋，大家你一言我一語咁話呢份禮物實用，又好啱嘟姐，最後估咗一輪，嘟姐發現原來係一支幾乎絕版嘅威士忌，佢即刻話：「呢份禮物真係冇得頂！真係好感動！冇諗過會搵到！」跟住大家又送上蛋糕，嘟姐喺IG留言話多謝呢個悉心安排！
雖然喺生日前夕，嘟姐因為今屆港姐嘅賽果問題而俾網民狂轟，搞到好拍檔曾志偉出聲撐嘟姐兼戥佢唔抵。
直到正日生日前夕，商台一班同事為佢慶祝，喺節目嗰度嘟姐好感慨話：「好開心可以做到呢份工，可以真人發聲，有好多事物、睇法都可以喺呢度講出嚟，並唔係電視台嗰個我，嗰個有好多稿要讀，但係呢個可以真真正正係自己，等多啲唔同年紀嘅人認識我！」
嘟姐亦話自己冇特別去慶祝登六，都係留俾自己靜靜地過，做啲自己鍾意嘅嘢！
(蘋果日報)
