【雙喜臨門】楊洛婷老公Tim:好似剪緊牛雜

    楊洛婷(Rabee’a)周四喺養和醫院誕下6磅半囡囡Tanya,老公Dear Jane主音歌手黃天翱(Tim)收工後趕得切入產房為囡囡剪臍帶!

    啱啱榮升做爹哋嘅Tim,今朝一早去咗迪士尼出席跑步活動,講起老婆Rabee’a同囡囡Tanya,Tim笑容滿面話:「其實好攰,呢兩日瞓得6個鐘,醫護人員教點餵人奶,不過太太未上奶,有醫護人員睇住太太,我好放心。」

    親手為囡囡剪臍帶嘅Tim,佢話嗰個感覺好刺激,相比樂園內嘅機動遊戲根本冇得比:「感覺好似剪緊牛雜,煙韌得嚟又淋淋地,其實最正係太太15分鐘就生咗,因為佢無痛分娩,幾舒服,見BB出世,我哋大嗌,嗰個感覺係形容唔到。」

    提到囡囡似太太,Tim話:「佢每兩個鐘就變樣,o依家收緊水。」Tim嘅囡囡出世,再加上Dear Jane推出新歌,可謂雙喜臨門,佢笑住話:「時間夾得好好,我覺得係天意,好感恩,(就連今日都跑第2?)瞓得6個鐘,所以個人high high哋,陣間都要衝去搵老婆。」

    會唔會作歌畀太太同囡囡?佢話o依家冇時間去寫,但如果有靈感都會作歌。至於會唔會再追多個?Tim話:「有諗過,但見步行步啦,慢慢嚟,o依家先生咗第1個。」佢透露中文名會由爺爺去改。問到Tim嘅隊友Jackal會唔會做契爺?佢話:「梗係做,等佢爸爸媽媽邀請我先,我連禮物都準備好喇!」

    (蘋果日報)

    SHARE