【生多個「豬」女】黎諾懿甜講小春雞

    黎諾懿今日到荃灣參與中秋嘉年華活動,同現場觀眾玩收賣佬遊戲,今朝零晨五點先收工嘅黎諾懿,就透露由於劇集要趕埋尾,而一幕遊船河戲份因之前颱風關係,o依家押至下月11日煞科當日先拍。

    不時喺網上分享愛兒雞仔片段嘅諾懿,直認經常都掛住雞仔,尤其享受每次雞仔似樹熊咁伏喺心口時候,佢話:「雞仔只係嗲外母同我,可能當咗媽咪係工人姐姐。嚟緊期待佢叫爸爸,不過佢叫媽媽先都啱,但好多時都事與願違。」太太都有呷醋話好少同雞仔合照,因為太太成日留喺屋企揼奶,冇出街唔化妝,所以噚日太太化妝出街,黎諾懿即刻幫佢影多幾張。至於會唔會再追多胎,諾懿話希望豬年可以生女。

    (蘋果日報)

    SHARE