【夠3個月公佈好消息】結婚紀念日收「最好的禮物」

今次終於係真啦﹗恭喜哂啊﹗

36歲大陸主持謝娜同細佢兩年嘅老公張杰於2011年5月結婚、同年9月喺香格里拉辦婚禮,結婚7年嚟感情穩定,今年結婚紀念日,佢哋收到一份「禮物」,按照民間傳統,怕BB小氣,要過3個月先可以公佈。

過咗3個月,張杰今日終於可以同大家講老婆謝娜有咗喇!張杰今早喺微博貼出二人合照,留言:「今年的結婚紀念日,我們有了最好的禮物,娜娜,辛苦了,永遠愛你~們,你們都是我的寶貝。」

相中老婆謝娜擁抱住老公,大晒溫情。謝娜亦轉貼post回覆:「最喜歡吃你每天早上給我煮的營養餐,心裏甜甜的,嫁給你是我的幸運,現階段更是我覺得人生最幸福的日子,未來的日子我們共同加油,和我們的寶貝一起幸福快樂的走下去!嘻嘻嘻嘻!」

謝娜未識張杰之前,同劉燁拍拖,當時謝娜只係一個主持人,劉燁未拎影帝,外界視佢哋係金童玉女,後嚟兩人分手之後,再見亦是朋友,2007年認識到張杰,喺一次頒獎禮上,張杰拎「最具人氣男偶像」獎,當時做主持人嘅謝娜大方承認戀情,「祝福我的男朋友張杰」,結婚多年,一直傳謝娜懷孕,但係次次都係謠傳。今次終於係真喇!

(蘋果日報)