【BB好靚好得意啊~】唔會極速收身:會食好多補品

    相中B女係楊洛婷(Rabee’a)同樂隊Dear Jane主音黃天翱(Tim)個寶貝女Tanya,Rabee’a喺上月中升呢做媽咪,早排安排攝影師上門,幫B女影咗輯相,順便影埋全家福。

    今日Rabee’a喺Instagram貼咗啲成品出嚟,佢接受周刊訪問時話:「我哋特登安排攝影師上門拍攝,仲就埋囡囡飲奶嘅時間,預咗3、4個鐘影,影咗10個造型,佢好合作,瞓足全程,不過有一個造型因為要唔着衫,佢pee pee咗喺啲道具上面。」

    講到育兒生活,Rabee’a話:「暫時湊佢都好容易,因為我校好咗每4個鐘餵奶同換片,如果我哋遲咗5分鐘,佢都會自然地起身喊叫我哋。」做現代靚媽,生B後通常會極速收身,但係Rabee’a冇咁做,佢解釋話:「因為餵緊人奶,所以會食好多補品,而且我陪月每日都會炮製好多靚靚嘅菜式俾我食。」

    之前Tim就講過Tanya 100日大當日係平安夜,仲話當日搞派對會好有意思,Rabee’a話屆時應該會喺海外探親,所以會喺當地搞party。

    (蘋果日報)

    SHARE