女神謝安琪（Kay）自從3月生咗細女張靖（Karina）後，一直專心相夫教子，提早過住「神奇女俠的退休生活」！
已經半歲仔嘅Karina首次過中秋節，尋晚阿Kay就帶咗仔仔張瞻同囡囡去參加屋苑中秋迎月晚會，老公張繼聰因為要拍戲所以唔喺現場！阿Kay一心諗住可以同班friend吹水吹風兼賞月，之不過Karina竟然驚驚豬，太怕生保而喊喊豬呀！
阿Kay今日凌晨喺facebook上載咗幾張相，見到阿Kay抱住嘅Karina眼泛淚光扁晒嘴仔，唔知仲以為發生咩事，原來係太熱鬧，阿Kay話：「一開始狀態不錯腳仔撐撐有啲威勢，誰不知當越（愈）來越（愈）多鄰居過來打招呼合照，妹妹就開始喊喊了！」
就連望住人群都驚，最後兩母女要「逃離現場」，歷時10分鐘嘅賞月夜就咁結束咗！阿Kay笑言女仔係要矜持啲，又透露兩兄妹性格好唔同，哥哥半歲時已經好識社交：「妹妹遲啲可以向哥哥拜師學習社交技巧喇！」」
當阿Kay返到屋企問囡囡感覺如何時，Karina就扁晒嘴，同一個emoji icon一樣樣，非常可愛，網民都笑言陰功豬，又叫阿Kay得閒要帶囡囡去蒲見識吓咁話！
阿Kay facebook全文：
「妹妹第一次參加屋苑既（嘅）中秋迎月晚會
一開始狀態不錯腳仔撐撐有啲威勢
誰不知當越（愈）來越（愈）多鄰居過來打招呼合照
妹妹就開始喊喊了
我立即一個箭步同哥哥妹妹二人避到樓梯頂
以為遠離人群妹妹就會平復心情
咁我就可以繼續同朋友吹水吹風兼賞月
可惜我既（嘅）如意算盤今次打唔響喇
妹妹遠遠望住人群仲係覺得驚驚
表情楚楚可憐仲一臉無辜
我都唔忍心要佢久留
我唯（惟）有叫哥哥自己同朋友留低繼續玩
我就要同妹妹先行回家
結束歷時十分鐘既（嘅）賞月初體驗
兩兄妹性格真係大不同啊
我記得哥哥半歲時已經相當sociable
妹妹女孩子確實比較有矜持
妹妹遲啲可以向哥哥拜師學習社交技巧喇
回到家後
我問妹妹對於今晚party覺得如何
佢以呢個emoji icon 😕既（嘅）表情回應」
(on.cc東網)
