錢國偉(Wilson)拍拖多年嘅「雜果賓治」陳宛蔚(Calinda)喺2015年結婚，雖然Wilson工作好忙，不過佢哋都好努力造人，最近終於傳喜訊！
今日有周刊報道話Wilson同Calinda造人成功，o依家Calinda陀B已經5個月，日前影到Wilson拖實老婆去咗花墟睇花，Wilson全程對老婆呵護備至，仲邊行邊摸佢嘅大肚，反而Calinda比較輕鬆，雖然身型比較圓潤，不過見佢都行得好輕盈。報道仲話Calinda有搵中醫調理身體。
Wilson知道老婆有咗之後，第一時間向曾志偉報喜，好多圈中朋友知道，都戥佢哋好開心。Wilson接受周刊訪問就話同老婆食咗一餐好開心嘅飯慶祝，不過佢嘅心情就好輕鬆，反而老婆就緊張啲！Calinda今日接受另一周刊訪問：「o依家有咗5個月，預產期喺明年新年前，係囡囡嚟㗎！」問到佢啲害喜情況，佢話：「冇呀，食得瞓得，真係多謝中醫師調理得好！」
(蘋果日報)
