杏兒一向同胡說八道會啲好姊妹，感情尤如家人，當中以「胡說八道會」姊妹之一嘅李施嬅最為觸目，因為李施嬅係杏兒老公李乘德嘅前度，不過杏兒大肚嗰陣，接受奇妙電視節目訪問時，講到杏兒與老公李乘德婚後甜蜜恩愛，又講到李乘德同李施嬅曾經拍拖，杏兒就落落大方咁話：「都已經係過咗去嘅事！」
昨日杏兒喺社交網宣佈生咗Baby Lee，身為「三契媽」李施嬅亦回覆傳媒：「BB!好cutie……好靚仔。今日放假回港去shopping，他們甚麼都有，又想搵一啲有心意特別啲嘅禮物，有點難買。送我自己啦。哈哈!」
至於，Baby Lee嘅「二契媽」姚子羚接受傳媒訪問就話：「係呀，好開心，見佢今日公佈咗。但我未去探，因為佢生嗰幾日我病咗，所以費事探住，嚟緊呢幾日會去探。有睇相，BB好得意好健康，覺得杏兒好叻，呢段時間佢休息緊。」
咁會送乜畀BB？姚子羚話：「Baby Shower時，我同胡蓓蔚已經送咗一份禮物，咁遲啲都會送多份，但未諗送乜，要睇媽媽想要乜嘢先。」講到BB似邊個？姚子羚只係睇咗相：「未睇清楚呀，但係一個眼大大嘅BB，好得意，係handsome BB。」
胡定欣接受傳媒訪問嘅時候，就話：「當然好開心BB終於岀世，一班契媽等左佢好耐。等杏兒休息下，再去探佢。」問到佢覺得BB似邊個多啲，佢就話：「有齊爸爸媽媽的優點。」
「細契媽」黃智雯透過短訊回覆傳媒：「知道呀!佢早幾日生咗，有send相畀我哋睇，好得意呀，但暫時忙工作未去探BB，亦知佢攰，等佢休息多幾日，返到屋企先去探杏兒啦。」之後，黃智雯話之前babyshower都送咗啲衫仔：「嚟緊送個吻啦。等佢滿月，睇吓再有乜啱Baby Lee啦!」
「大契媽」胡蓓蔚亦回應傳媒：「探咗啦！送咗好意頭嘅禮物俾BB！(BB似媽咪定爹哋？)都似！超靚仔兼得意！」
此外，好友陳山聰短訊回覆：「恭喜恭喜，希望小朋友同杏兒都身體健康、幸福快樂☺小朋友快高長大。」
(蘋果日報)
