大陸節目《爸爸去哪兒5》拍到第五輯，係好多話題嘅，好似有陳小春不斷鬧阿仔Jasper，而Yumiko上大陸節目《不可思議的媽媽》湊女湊到情緒崩潰，當場痛哭，自言連工作人員都不如，呢啲節目主打明星湊仔。
之不過……最近有個變種節目《寶貝的新朋友》，有時搵下啲小朋友上去，有時又搵下啲長輩級嘅明星，講下星二代嘅童年。
啱啱四哥謝賢獲邀上呢個節目，仲公開咗一批霆鋒細個時候嘅相！
呢批相，真係非常非常少見，其中一張黑白係後生嘅四哥喺醫院探霆鋒BB，兩父子真係似足9成。
另外有一張係霆鋒BB喺浴盆沖涼嘅相，「小霆鋒」當然打咗格仔，睇唔到啦!
仲有幾張兩父子嘅生活照，由細細個陪住霆鋒玩木馬，到童年跟四哥出海釣魚嘅相都有。唔知霆鋒見到啲相會唔會面紅呢？
(蘋果日報)
