藝人林盛斌（Bob）工作忙到爆，事關佢要努力工作賺錢養老婆同四個小朋友，所以平時忙到連屋企人都好少見，更莫講話朋友聚會，但今日打風，Bob竟然約到同佢一樣係大忙人嘅陸永！
Bob仲帶埋老婆仔女去到陸永屋企聚會，佢影咗張相放上社交網，留言話：「唔係打風，我諗要約多半年先成事，終於見到兩位陸小姐同特別嘉賓洪先生….點解淨係我三個女望鏡，陸生你屋企係咪有嘢？」
睇相見到陸永老婆同兩個囡囡都在場，現場仲有一位小朋友，估計就係Bob口中嘅洪先生，最搞笑係陸永兩個囡囡唔望鏡頭，但就口擘擘望向另一面，不過成張相一共有七個小朋友，要佢哋全部都望晒鏡頭嘅話，難度應該好高喎！
(on.cc東網)
