林子善今年七月入紙排期與圈外女友kary結婚，當時仲話會喺十月初先簽字，然後去馬爾代夫影結婚相，到明年4月3日先會擺結婚酒。
今日林子善就喺社交網上載一張瞓地被女友牽住鼻窿嘅相，十分搞笑，仲留言：「20171016之上路，有傻人終成眷屬，一起踏上婚姻之路。」
原來今日林子善簽字結婚，真係恭喜晒！
隨後Kary亦喺社交網上載二人合照，同大家分享喜悅，佢仲留言話：「以後要相親相愛，唔好成日蝦我啦！I LOVE U！」相當Sweet，再一次恭喜晒林生林太！
人逢喜事精神奕奕嘅子善，原來係啱啱拍完通宵戲沖個涼休息一陣就去註冊結婚，相當匆忙。
子善仲話：「我老婆簽字好似簽卡咁快，我就特登搞氣氛，扮想簽同唔想簽之間，大家見到都笑，因為我唔想整到太感人，因為我同老婆都好易喊，唔想大家被感染一齊喊。」
(on.cc 東網)
