「抓豆袋」呢一款懷舊玩具，相信係唔少香港人嘅集體回憶，而育有兩個女兒嘅湯盈盈，之前仲同大女Alyssa一齊喺「big big channel」大玩抓豆袋。
湯盈盈一嚟就同囡囡講解遊戲嘅玩法，仲示範埋畀佢睇應該點樣玩。
Alyssa雖然眼定定咁望住湯盈盈拋高啲豆袋，不過當佢一聽到媽咪叫佢試吓玩嘅時候，佢一口拒絕之餘仲話自己一定接唔到。
面對囡囡拒絕自己嘅湯盈盈，反而表現得相當有耐性，仲好有耐心咁同囡囡講：「你都未試過，又點知自己唔得呢？」一班網民睇完都大讚湯盈盈面對囡囡耐性十足。
之後Alyssa亦都有嘗試去拋高個豆袋，點知一拋就跌咗落地。眼見個豆袋跌咗落地，佢即時好氣餒咁話：「I cannot do it」。
湯盈盈亦都繼續鼓勵囡囡再試，Alyssa亦都好聽話，不過佢就一改遊戲玩法，用兩隻手去接番個豆袋，之間佢仲突然大叫，相當搞怪呀！
唔少網民都讚湯盈盈教女有方，雖然面對囡囡未試就叫唔得，不過佢都依然相當有耐性。有人話Alyssa人仔細細就已經全程都用英文同媽咪溝通，相當叻女。
(on.cc 東網)
