做咗人妻嘅鍾嘉欣，婚後大部份時間喺加拿大生活，但係近排都多咗機會返香港搵奶粉錢！月初就有讀者透過「爆相爆片」，喺機場捕獲佢哋一家三口返香港嘅相片，據知，嘉欣今次和老公、囡囡返香港，喺香港逗留兩個星期，趁中秋節假期探親兼和朋友敍舊！
不過歡樂時光過得特別快，今日有周刊報道話嘉欣同脊醫老公Jeremy兼B女Kelly，喺上周六已經飛返加拿大，兩公婆全程任影唔嬲，囡囡就好好奇咁周圍望，佢哋喺香港逗留呢段期間，去咗又一城shopping，出咗名係慳妹嘅嘉欣除咗去Uniqlo買衫之外，仲買咗好多粉藍色嘅BB用品，唔通為第二胎做準備？
報道仲話嘉欣明年4月約滿大台，本來樂小姐喺半年前已經同嘉欣傾約，不過嘉欣一直都唔願意傾，嘉欣唔傾嘅原因，並係佢唔想拍劇，相反佢仲好鍾意拍劇㖭，仲好希望可以拎視后，奈何佢老公Jeremy唔係好鍾意老婆做幕前，淨係可以俾佢間唔中返嚟出席活動，而且佢仲想嘉欣可以幫佢生多三個小朋友，寧願佢花多啲時間努力造人喎！
(蘋果日報)
