【送女去泰國讀書好自私﹖】羅敏莊為樓同老公鬧大交

      

    十年前,「風之后」李麗珊話養大一個小朋友要400萬元;但o依家柴米油鹽乜都貴,樓價更加係升到癲咗!早前有周刊搵咗阿Bob粗略估算養大四個小朋友,即使唔讀國際學校,都要花費約2100萬。嘩!呢個數目,真係唔係每個家庭都可以負擔得起。

    冇咁多錢,但又想俾小朋友過較優質生活,羅敏莊(MiMi)就計劃5年後移民去泰國生活。MiMi笑言﹕「我老公都50歲,要幫佢諗定退休後點hea,有呢個plan,主要係因為我孤寒同慳家,香港乜都貴,真係唔捨得拎筆錢去買間「豆腐潤」咁細嘅上車盤,寧願買一個自己鍾意嘅地方。」

    MiMi早前將自己層村屋加按後,以一炮過形式買咗一間800餘呎、價值約300萬元嘅泰國樓,佢話最初同老公陳國邦為買樓都鬧大交﹕「佢直情唔啋我,因為老公係97年嘅負資產人士,層樓變銀主盤,仲要欠銀行錢。所以佢好驚買樓,所以我每次買樓都鬧大交。佢覺得既然香港層樓都差唔多供完,做乜要搞咁多嘢?但我又覺得現在有能力,錢係會貶值嘅,既然租金都可以cover番,我又真係諗住遲啲香港泰國兩邊住,最好似朱咪咪咁,有嘢唱咪返嚟囉,我都想plan一個咁嘅人生。」

    因為MiMi實在太鍾意泰國,買完樓,仲諗住安排5歲大嘅囡囡陳禛去泰國讀書,問到擔唔擔心俾人覺得太自私?MiMi就話﹕「咁我會陪佢去㗎嘛。咁啲人送仔女去英國、美國讀書都一樣,咁我哋想揀嗰間國際學校,請嘅係英國教師,主要都係用英語溝通,同香港國際學校差唔多。」有冇囡囡商量過?佢話﹕「其實囡囡仲細個,同佢講佢最多只係覺得泰國呢個地方好好玩,好開心呀!如果佢真係去嗰邊讀書,我都會觀察住佢,到時有咩唔適應,就會再調整。」

    不過,MiMi同老公陳國邦早前已經帶埋囡囡去過泰國,參觀哈羅曼谷國際學校,MiMi話﹕「因為有朋友都送咗仔仔過去,其實喺香港讀可能要幾百萬入場費,但泰國幾十萬就可以,雖然學費差唔多。睇過泰國間國際學校,地方真係好大,校舍有湖、6個網球場,咁多嘢玩,有時諗如果我媽媽可以俾到我一個咁嘅童年,真係好開心。」不過,泰國政局不穩,MiMi話唔擔心得咁多,佢笑言﹕「香港都唔見得好好,其實每個地方都有唔同危險,我係普通市民,唔會搞事,只想過平淡退休生活。」

    (蘋果日報)

    SHARE