【魂飛魄散…】《愛.回家》突然少咗一角 劇情完全冇交代

           

    講起28歲嘅陳浚霆(Andrew),你會諗起佢媽咪顧紀筠?喺《街市遊樂團》入面畀江美儀狂抦嘅「街僮」?抑或喺處境劇《愛.回家之開心速遞》入面隻鬼「風少」?

    不過,《街市遊樂團》第三輯,「街僮」冇份做,而若果你有追開《開心速遞》,你可能會發現,早喺兩個禮拜前,依附喺相機入面嘅鬼風少,無啦啦唔見咗,劇情又冇交代佢去咗邊,好似從來冇出現過咁,唔通風少去咗「投胎」,定抑或俾人打到「魂飛魄散」咗?

    以上揣測都唔係,事實係陳浚霆上個禮拜,已經同大台完咗約,結束3年賓主關係。有報道話佢係因為成為余詠珊曾勵珍權鬥犧牲品,工作俾人停晒,綜藝同戲劇兩邊都冇得撈,實情係點呢?

    據知,陳浚霆走得咁急,係因為大台遲遲冇同佢傾續約,到差不多完約嗰陣,公司先同佢講,如果想續約,會將底薪降到得$8,000,肯做就留低,唔制就過主,陳浚霆一氣之下,劈炮唔撈。

    而另一講法就係,喺美國紐約大學以雙榮譽學士畢業嘅陳浚霆,學歷、家底都唔弱,曾經參加過《超級巨聲4》嘅佢,對唱歌依然滿腔熱誠,不過大台就一直安插佢入劇組拍劇或者做綜藝節目,冇乜機會唱歌,喺意興闌珊下,又見自己仲後生,趁完約出去闖吓。

    對於冇同大台續約,陳浚霆回應周刊時直認不諱,更指係喺呢個禮拜同娘家講bye bye。

    「自己唔細,一續約就續幾年,到時30幾40歲先走出嚟或者上大陸搵機會,驚冇咁嘅魄力。我之前都有同(江)美儀、麥包佢哋講,諮詢吓佢哋嘅意見,仲有噚晚就同《愛.回家》班同事講咗,佢哋都覺得我應該試吓出去,哈哈,佢哋仲好好咁,送上祝福o忝!」

    有網民話處境劇忽然唔見咗風少,冇交代劇情離晒譜,有周刊都有追問陳浚霆究竟「風少」下場如何?係咪真係魂飛魄散定係戲劇性咁失蹤?但陳浚霆就避而不談,只係話相信劇組會處理,問到係咪因為人工低所以唔留低,陳浚霆就話:「錢唔係我主要concern嘅嘢,其實呢個決定都有同媽咪商量,佢都好贊成我唔留低。」

    (蘋果日報)

    SHARE