周杰倫與老婆昆凌喺2014年結婚後，先後誕下一子一女，實行三年抱兩！
一向對仔女相當保護嘅周董，不嬲都唔多晒大女「小周周」嘅相，而細仔「小小周」嘅樣貌更加係從未曝光！
唔少粉絲都相當好奇4個月大嘅「小小周」究竟似爹哋定係媽咪多啲。
今朝，周董喺社文網Instagram罕有晒出一張B仔相，並留言：「朋友小孩眼睛真大。」但網民都唔信係「朋友」嘅，仲話係「朋友是本人系列」！
貼文一出，唔少粉絲都好激動，話呢個BB根本就唔係周董老友嘅BB，而係「小小周」！
相中嘅BB頭戴深灰色冷帽，面部微微朝下，但仍然清晰見到其五官。只見B仔眼大大，皮膚白滑，個樣相當可愛！
睇真啲，BB嘅眼又真係幾似昆凌，而個嘴就有啲似周董。網友見到後都紛紛大讚BB得意兼顏值高，問周董幾時再晒兩姊弟嘅正面相！
(on.cc 東網)
