【張栢芝facebook回應】杜汶澤:下次嫁個讀多d書嘅﹗

杜汶澤除咗鍾意煮嘢食之外仲好喜歡行山,今日佢就同咗個鄰居去行山,好笑嘅係,阿澤行完山之後喺facebook貼文咁樣講:「投(頭)先同個鄰居去行山,佢以前同過我一個讀好少書嘅朋友拍過拖,雖然結果嫁咗第個,但係我都勸佢:你下次再嫁可唔可以嫁個讀多d書咖(o架)?點知佢話:雖然我無讀過書但係我咩都識!笑到我差d碌X咗落山。」

阿澤仲連續落咗幾個hashtag「成世人都咁鍾意認叻嘅」、「除左(咗)做戲同滑水你仲識咩呀」、「識唔識整穿梭機呀」、「佢真係好cute」,咁到底阿澤呢位鄰居係邊個呢?

原來就係張栢芝,阿澤仲話叫栢芝下次再嫁要嫁個讀書多嘅o添!睇番張栢芝嘅facebook,佢都有貼圖話自己行完山,見佢着住灰色外套、cap帽、太陽眼鏡,而且佢仲喺杜汶澤個facebook度留言4次,分別回應阿澤嘅問題:「你個朋友唔係鍾意認叻佢確實係叻,請你欣然接受」、「滑水同埋做戲只係表面嘅視覺效果,深層深度嘅仲未公開」、「穿梭機唔使識整,只要屋企有一架就得啦」、「好欣賞你懂得欣賞別人嘅真實性格cute and pretty wakakakakakk」。

(蘋果日報)