【《空凳》廿幾年前㗎啦】夏韶聲再提「陳仔」

     

    夏韶聲即將係10月29號假旺角麥花臣場館,舉行概念大碟《Arrival 2020》專輯音樂會,日前佢喺荃灣通利琴行接受周刊訪問,講到今次音樂會嘅籌備時間係佢入行四十年嚟最急嘅一次:「只係得一個月左右時間去準備,我九月先知道有十月尾呢個期,仲要係朋友幫手。」夏爺堅持要今年舉行係咩原因?佢話:「因為今次呢個係Concert Album,我覺得喺2017年推出,就希望喺今年之內可以舉行到個音樂會。」

    夏爺強調今次係音樂會形式並非演唱會,佢話:「演唱會就會唱好多觀眾鍾意聽嘅歌,純粹係一個表演,但我今次只會演繹碟入邊嘅歌,雖然我碟內半隻字都冇提過外星人同UFO,但相信成個意思都不言而喻,話唔定到時『陳仔』都喺樓上睇緊。」

    夏爺又透露想喺今年內完成整個Project,原因係佢明年年中會有另外一個重要演出要準備,係咪傳聞中嘅紅館演唱會?但佢就唔肯透露太多,淨係話暫時只專注嚟緊嘅演出。由於只演一場,夏爺強調自己今次分文不收:「搞手都已經租咗個場,仲有台燈音響同埋樂手嘅成本,如果我仲要收錢佢搞唔成㗎啦,我今次亦都唔係為錢,事實上搞得一場行內都知一定蝕錢,但我真係好想做好呢件事。」

    入行已經四十年,但夏爺依然滿肚大計,有好多計劃好想實行,佢話:「好似今次呢個演出最主要我只希望拍低啲片段,因為過往都好少片段喺網上,希望今次可以拍低片段畀其他地方嘅人睇返,老實講就算想做巡迴都要有個版畀人睇㗎嘛。」咁係咪真係打算之後會開巡迴演出?夏爺話:「唔知㗎有咪做囉,我入行都40年喇有咩未試過?唯一就未試過做巡演,有時出去表演個個都淨係叫我唱《空凳》,大佬呀《空凳》廿幾年前㗎啦,人要進步㗎。所以我有好多計畫想做,或者第時唔唱歌都未定㗎。」

    SHARE