郭羨妮（Sonija）、黃淑儀、曾航生、呂熙同潘杰寧今日喺堅尼地城魯班先師廟，為港台劇集《獅子山下2017》拍攝，Sonija透露首次拍《獅子山下》，雖然只係拍兩日，但每日都要拍18、19個鐘。
劇情講述Sonija喺廟內求子，佢笑住話：「我一邊拍一邊求，不過呢啲要放鬆啲，刻意真係唔得，o依家我嘅心態係，冇都唔緊要，因為我已經有個女，出年個女升小學，o依家同佢報咗7、8間小學，不過未有消息。」會唔會讀國際學校？
Sonija表示暫時未諗，佢希望囡囡入讀傳統學校。對於10月1日係Sonija同老公朱少杰嘅結婚6周年，問到點慶祝？Sonija話：「老公返咗香港5日，我哋都係食飯、行街買嘢。」老公有冇送結婚周年禮物？Sonija笑笑口咁話：「有，但係唔啱我用，所以我拎去換款，或者叫佢折現，以前佢送咗部美容機畀我，我冇用，於是我拎去換家庭用品。」雖然同老公聚少離多，但感情如舊，佢話：「我啱啱去北京見到佢，都有啲拍拖感覺。」
(蘋果日報)
